Dende onte luns e ao longo do día de hoxe desenvolvéronse diferentes relatorios sobre planificación da acuicultura; avaliación do impacto ambiental e seguimento da acuicultura en Galicia e en países mediterráneos; procedementos de outorgamento de licencias na comunidade autónoma galega ou criterios de selección de emprazamento de actividades de acuicultura.
No seminario participaron expertos e representantes da administración e de centros de investigación de países como Croacia, Albania, Grecia, Turquía, Marrocos e Italia, ademais de Andalucía, Comunidade Valenciana e Galicia, como foi o caso de Fernando Otero Lourido, representante da Asociación de Produtores de Rodaballo de Galicia –AROGA-. Otero Lourido expuxo o exemplo galego en temas de planificación. Tamén tomaron parte neste encontro membros da Secretaría General del Mar, como foi o caso do director general de Ordenación Pesquera, Ignacio Gandarias, quen inaugurou o evento xunto ao director xeral de Ordenación e Xestión dos Recursos Mariños da Consellería do Mar, Pablo Fernández Asensio, e á directora do CETMAR, Paloma Rueda Crespo.
O seminario serviu así para analizar a normativa e o procedemento para a posta en marcha de granxas acuícolas nos diferentes países do Mediterráneo e para consensuar as mellores prácticas neses procesos, todo elo no marco do proxecto ShocMed, no que participa o CETMAR desenvolvendo unha análise comparada do marco normativo no Mediterráneo. O devandito proxecto ten como obxectivos a elaboración de criterios para reforzar a integración da acuicultura na Xestión Integral das Zonas Costeiras (ICZM), mediante a mellora na selección de localizacións e o establecemento de puntos de referencia para determinar a capacidade de carga das instalacións de acuicultura. Isto proporcionará, así mesmo, unha base para a harmonización de estándares así como para a adecuación de marcos normativos e políticas públicas de acuicultura no Mediterráneo que garantan a competitividade en igualdade de condicións e minimicen o impacto medioambiental da actividade.